Гурӯҳи аввали ҳайати нозирони интихоботи парлумонӣ аз Иттиҳоди Давлатҳои Мустақил (ИДМ) таҳти сарварии муовини раиси Кумитаи иҷроияи ИДМ Владимир Гаркун рӯзи 12-уми феврал ба Душанбе ташриф меорад.

Роҳбари дастгоҳи КМИР Тоҷикистон Абдуманнон Додозода дар ин робита иттилоъ дод, ки гурӯҳи асосии нозирони ИДМ, ки онро раиси Кумитаи иҷроияи ИДМ Сергей Лебедев роҳбарӣ мекунад, наздикиҳои санаи баргузории интихобот ба Душанбе меоянд.

Зимнан зикр гардид, ки то имрӯз КМР Тоҷикистон 30 намояндаи Дафтари институтҳои демократия ва ҳуқуқи башари Созмони амнияту ҳамкории Аврупо (ДИДҲБ/САҲА/), 15 наояндаи Ассамблеяи байнипарлумонии ИДМ ва 3 намояндаи Созмони ҳамкории Шанхайро ррасман ба сифати нозирони байнулмилалӣ ба қайд гирифтааст.

Додозода таъкид дошт, ки дар пайгирӣ (мониторинг)-и интихоботи парлумонии Тоҷикистон беш аз 500 нафар нозирони байнулмилалӣ аз созмонҳои ҷаҳониву минтақавӣ ва кишварҳои ҷудогона ширкат хоҳанд варзид.