Канслери Олмон Ангела Меркел бо Президенти Фаронса Франсуа Олланд бо як сафари ғайриинтизори сулҳҷӯёна вориди Украина шуданд. Онҳо дар шаҳри Киев бо президенти Украина Петр Порошенко мулоқот анҷом намуда, вазъи кунунии ин кишвари ҷангзадаро мавриди баррасӣ карор доданд.

Бино ба иттилои торнамои расмии телевизиони «Ҷаҳоннамо», ҳамакнун имрӯз онҳо ҷиҳати мулоқот бо Владимир Путин озими Федератсияи Россия мешаванд.

Гуфта мешавад, роҳбарони воломақоми Франсия ва Олмон иброз доштаанд, ки барои хотима гузоштан ба задухӯрдҳои мусаллаҳона дар Донбасс ва Донеск пешниҳоди нав дошта, муътақиданд, ки пешниҳодашон ҷонибҳои даргирро қонеъ гардонида метавонад.

Зимнан зикр мегардад, ки нимаи аввали рӯзи панҷшанбеи ҳафтаи равон Котиби давлатии ИМА Ҷон Керри дар шаҳри Киев зимни вохӯрӣ бо Президенти Украина изҳор дошт, ки хостори ҳалли мусолиматомези дипломатии ҷонибҳои даргир аст.

Котиби давлатии ИМА аз Украина ба Брюссел сафар кард. Дар Брюссел намояндагони воломақоми кишварҳои аъзои НАТО масъалаи даргириҳо дар Украина ва роҳҳои хотима гузоштан ба нофаҳмиҳоро мавриди муҳокима қарор медиҳанд.