Зимни мулоқоти муовини аввали вазири молияи Тоҷикистон Ҷамолиддин Нуралиев бо ёвари муовини котиби давлатии ИМА Даниэл Розенблюм дар Душанбе масъалаҳои ҳамкориҳои дуҷониба дар бахши энергетика мавриди баррасӣ қарор гирифтанд.

Бино ба иттилои котиботи Вазорати молияи ҶТ, дар мулоқот тарҳи фанниву иқтисодии лоиҳаи сохтмони хатти интиқоли барқи CASA-1000 баррасӣ шуда, ҷонибҳо зикр карданд, ки ин лоиҳа ояндадор ва сердаромад буда, иқдоми мазкур дар самти таҳкими ҳамкориҳо дар минтақа муҳиму саривақтӣ аст. «Дар вохӯрӣ ҳамчунин атрофи масъалаи дурнамои сохтмони нерӯгоҳи Роғун табодули назар сурат гирифт», - қайд мешавад дар хабари котиботи Вазорати молияи ҶТ.

Гуфта мешавад, ҷонибҳо ҳамчунин ба масъалаи марбут ба таъсири таҳримҳои ҷоришуда нисбати Русия ба иқтисоди Тоҷикистон низ таваҷҷуҳ зоҳир намуда, аҳамияти амалисозии барномаҳои пешбинишуда ва зарурати ҳамоҳангсозии муносибатҳои Тоҷикистон бо Бонки ҷаҳонӣ, Бонки осиёгии рушд, Хазинаи байнулмилалии асъор ва дигар созмонҳову ниҳодҳои байнулмилалиро таъкид намуданд.