Ба ҷуз Ҳизби халқии сотсиал-демократии Тоҷикистон (ҲСДТ), дигар ҳамаи аҳзоби сиёсии Тоҷикистон номзадҳои худ ба вакилӣ дар Маҷлиси вакилони халқи шаҳри Душунаберо пешбарӣ намуданд.

Раиси Комиссияи интихоботии шаҳри Душанбе Санавбар Раҳимова ба «Азия-Плюс» дар ин робита иттилоъ дод, ки ба 70 курсии вакилӣ дар Маҷлиси вакилони халқи пойтахт 161 нафар номзадҳо пешбарӣ шудаанд, ки 150 нафарашон расман ба қайд гирифта шуданд. «Сабаби рад шудани номзадии 11 нафари боқимонда ба аҳзоби сиёсии онҳоро пешбарикарда шарҳ дода шуд», - иброз дошт ӯ.

Ба иттилои номбурда, барои ишғоли курсиҳои вакилӣ дар Маҷлиси вакилони халқи шаҳри Дущанбе намояндагони 7 ҳизб – ҲХДТ, ҲКТ, ҲСТ, ҲИИТ, ҲДТ, ҲАТ, ҲНИТ ва ҳамчунин ғайриҳизбиён рақобат хоҳанд кард, ки рӯйхати пурраи номзадҳо ояндаи наздик дар ВАО-и шаҳр чоп мешавад.

Зимнан зикр гардид, ки раиси пойтахт Маҳмадсаид Убайдуллоев аз ҳавзаи интихоботии №25-и ноҳияи Исмоили Сомонии шаҳри Душанбе номзад ба вакилӣ дар Маҷлиси вакилони халқи шаҳри Душанбе пешбарӣ шудааст.