Вазири рушди иқтисод ва савдои Тоҷикистон Неъматулло Ҳикматулозода бо ноиби президенти Агентии Ҷопон оид ба ҳамкории байналмилалӣ (JICA) ҷаноби Киёши Кодера мулоқот орост.

Бино ба иттилои хадамоти матбуоти Вазорати мазкур, дар оғози вохӯрӣ ҷаноби Киёши Кодера Неъматулло Ҳикматуллозодаро барои ба мансаби вазир таъин шудан табрик намуда, сипас, аз мақсади мулоқоташ, ки баррасии фаъолияти JICA дар Тоҷикистон ва таъсири омилҳои берунӣ ба иқтисоди кишвар мебошад, ибрози назар намуд.

Гуфта мешавад, Н.Ҳикматуллозода дар навбати худ аз густариши ҳамкории судманд байни Ҷумҳурии Тоҷикистон ва Ҷопон, алалхусус дар самти Агентӣ оид ба ҳамкории байналмилалӣ изҳори қаноатмандӣ намуд.

Зимнан зикр мегардад, ки тақвияти ҳамкориҳои мутақобилан муфид, таҳияи Стратегияи нави JICA барои Тоҷикистон, вазъи иқтисоди кишвар ва омилҳои рушди устувори он, робитаҳои иқтисодии хориҷӣ ва татбиқи барномаҳои муштарак аз мавзуъҳои дигари мулоқоти дуҷониба буданд.