Президенти Тоҷикистон Эмомалӣ Раҳмон ба муносибати фарорасии иди миллии Эрон – солгарди пирӯзии Инқилоби Исломӣ ба президенти ин кишвар Ҳасани Рӯҳонӣ барқияи табрикӣ ирсол намуд.

Бино ба иттилои хадамоти матбуоти сарвари давлат, дар барқияи табрикии Эмомалӣ Раҳмон дар ин робита таъкид мегардад, ки барои Тоҷикистон муносибатҳо бо Ҷумҳурии Исломии Эрон ҳамеша мавқеи муҳимму вижаро ишғол менамоянд ва таҳкиму густариши ҳамкориҳои гуногунарсаи судманд бо Эрон, ки ба заминаи ҳамзабонӣ, фарҳанги ягона ва анъанаҳои таърихии дӯстию бародарии мардумони ду кишвар такя мекунанд, ҷавобгӯ ба манфиатҳои олии ҳарду ҷониб ва суботу амнияти минтақа аст ва Тоҷикистон ба дурнамои он бо назари нек менигарад.

«Тоҷикистон ҳамеша хоҳони боло рафтани сатҳи муносибатҳои дуҷонибааш бо Эрон дар бахшҳои иқтисодиву иҷтимоӣ ва сиёсиву фарҳангӣ буда, мӯътақид аст, ки кишварҳои мо бо талоши муштарак ба қуллаи мақсуд хоҳанд расид», - омадааст дар барқияи табрикии сарвари давлати Тоҷикистон.

Дар фарҷом Эмомалӣ Раҳмон азми қавӣ изҳор медорад, ки Тоҷикистон ҳамшарикии судманди дуҷонибаро минбаъд ҳам идома дода, муносибатҳои воқеан бародаронаро боз ҳам тавсеа ва густариш хоҳад бахшид.