Маҷлиси намояндагони Маҷлиси Олии ҶТ Созишномаи сармоягузорӣ  байни ҳукумати Тоҷикистон ва ширкати туркии «Кока-Кола- Ичечек А. С» оид ба сохтмон ва истифодаи корхонаи истеҳсоли маҳсулоти ғайримашруботиро баррасӣ ва тасдиқ намуд.

Зимни шарҳи созишнома ба вакилон муовини аввали раиси Кумитаи давлатии сармоягузорӣ ва идораи амволи давлатии ҶТ Лочин Файзуллозода изҳор дошт, ки баҳри амалисозии созишномаи мазкур дар ҳаҷми 50 млн. доллари ИМА маблағгузорӣ пешбинӣ шудааст.

Ба қавли Файзуллозода, дар марҳилаи аввали амалисозии лоиҳа ҳаҷми маблағгузорӣ 30 млн. ва дар марҳилаи дуюм – 20 млн. доллари ИМА-ро ташкил дода, иқтидори корхона ба истеҳсоли 100 млн. литр маҳсулоти ғайримашруботӣ дар як сол баробар хоҳад буд.

Муовини аввали вазир ҳамчунин қайд кард, ки амалисозии лоиҳа моҳи майи соли 2015 дар Душанбе оғоз гардида, марҳилаи аввали сохтмони он ахири соли оянда ба итмом мерасад.

Зимнан зикр гардид, ки давоми панҷ соли аввал баъди ба истифода додани корхона аз ҳисоби пардохти ҳамаи навъи андозҳо ба буҷети давлатӣ 20 млн. доллари ИМа маблағ ворид гардида, 120 нафар шаҳрвандони ҷумҳурӣ бо ҷойҳои домии корӣ таъмин карда мешаванд.