Гурӯҳи аввали ҳайати нозирони интихоботи парлумонӣ аз Иттиҳоди Давлатҳои Мустақил (ИДМ) таҳти сарварии муовини раиси Кумитаи иҷроияи ИДМ Владимир Гаркун имрӯз, 12-уми феврал ба Душанбе ташриф меорад.

Роҳбари дастгоҳи КМИР Тоҷикистон Абдуманнон Додозода дар ин робита иттилоъ дод, ки гурӯҳи асосии нозирони ИДМ, ки онро раиси Кумитаи иҷроияи ИДМ Сергей Лебедев роҳбарӣ мекунад, наздикиҳои санаи баргузории интихобот ба Душанбе меоянд.

«Ҳайати нозирони интихоботи парлумонӣ аз Иттиҳоди Давлатҳои Мустақил (ИДМ) санаи 13-уми феврал ба кор шурӯъ намуда, фаъолияти худро 2-юми март ба итмом мерасонад», - иброз дошт ӯ.

Зимнан зикр гардид, ки то имрӯз КМИР Тоҷикистон дар маҷмӯз 131 нафар намояндагони Дафтари институтҳои демократия ва ҳуқуқи башари Созмони амнияту ҳамкории Аврупо (ДИДҲБ/САҲА/), Ассамблеяи байнипарлумонии ИДМ, Созмони ҳамкории Шанхай, ИМА, ИДМ ва Туркманистонро расман ба сифати нозирони байнулмилалӣ ба қайд гирифтааст.

Додозода таъкид дошт, ки дар пайгирӣ (мониторинг)-и интихоботи парлумонии Тоҷикистон беш аз 500 нафар нозирони байнулмилалӣ аз созмонҳои ҷаҳониву минтақавӣ ва кишварҳои ҷудогона ширкат хоҳанд варзид.