Дар маъракаи интихобот ба Маҷлисҳои вакилони халқи вилоят, ноҳия ва шаҳрҳо 6 ҳазору 32 нафар шаҳрвандони Тоҷикистон ба сифати номзад ба вакилӣ ба қайд гирифта шуданд.

Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки миёни номзадҳо сабтшуда ба вакилӣ дар маҷлисҳои маҳаллӣ намояндагони ҳашт ҳизби сиёсии кишвар, афроди тариқи худпешбаришуда ва ғайриҳизбиён ҳузур доранд.

«Мутобиқи талаботи меъёрҳои қонунгузорӣ сабти номзадҳо ба вакилӣ дар ҷамоатҳо то 23 феврал идома меёбад «, - иброз дошт ӯ.

Додозода хотиррасон намуд, ки комиссияҳои ҳавзавии интихоботии Тоҷикистон 185 нафар шаҳрвандони кишварро расман номзад ба вакилӣ дар палатаи поёнии парлумони ҷумҳурӣ ба қайд гирифтанд.

Аз ҳавзаҳои якмандатии интихоботӣ дар маҷмӯъ 212 нафар номзадҳо пешбарӣ шуда буданд, вале 27 нафари онҳо ё номзадии худро бозпас гирифтаанд ва ё ба комиссияҳои интихоботӣ ҳуҷҷатҳои заруриро пешниҳод накардаанд.

Аз 185 нафар номзадҳои расман сабтшуда 80 нафарашон тариқи худпешбарӣ ва 105 нафарашон аз ҷониби аҳзоби сиёсӣ пешбарӣ шуда, аз ҳавзаҳои якмандатии интихоботӣ 32 нафар занон низ барои курсии вакилӣ рақобат мекунанд.

Қобили зикр аст, ки аз ҳавзаи ягонаи умумиҷумҳуриявӣ тибқи рӯйхатҳои ҳизбӣ 22 нафар вакил ба палатаи поёнии парлумон интихоб мешавад. Аз ҳавзаи мазкур КМИР Тоҷикистон 103 нафар номзадҳоро ба қайд гирифт.

Аз ҳавзаҳои якмандатии интихоботӣ 41 нафар вакил ба падатаи поёнии парлумон интихоб мешавад. Аз ин ҳавза КМИР Тоҷикистон 185 нафар довталабон ба курсии парлумониро сабти ном кард.

Ҳамин тариқ, ба 63 курсӣ дар палатаи поёнии парлумони Тоҷикистон 288 нафар номзадҳо довталабӣ мекунанд.