Моҳи январи соли равон ба Тоҷикистон ҳамагӣ ҳудуди 38 ҳазор тонна маҳсулоти нафтӣ ворид гардид, ки дар муқоиса бо моҳи январи соли 2014 қариб 45% камтар аст.

Тавре ба «Азия-Плюс» аз Агентии омори назди президенти ҶТ хабар доданд, моҳи гузашта ба Тоҷикистон ба маблағи 30,1 млн. доллари ИМА 37,4 ҳазор тонна маҳсулоти нафтӣ интиқол дода шудааст. Моҳи январи соли 2014 ба Тоҷикистон ба маблағи 56,7 млн. доллари ИМА 66,5 ҳазор тонна маҳсулоти нафтӣ ворид гардида буд.

Бо назардошти афзоиши ҳамасолаи воридоти маводи сӯзишворӣ ба Тоҷикистон, ба ин миқдор коҳиш ёфтани ҳаҷми воридоти маҳсулоти нафтӣ тааҷҷубовар аст.

Тибқи маълумоти Агентии омор, ба Тоҷикистон соли 2012 — 373 ҳазор тонна, соли 2013 – 376 ҳазор тонна ва соли 2014 – 580 ҳазор тонна маҳсулоти нафтӣ ворид гардидааст.

Ёдрас мекунем, ки аввали соли равон мақомоти дахлдори марбут ба бахши энергетикаи Тоҷикистону Русия оид ба тавозуни индикативии сӯзишворӣ дар соли 2015 ба мувофиқа расиданд. Тибқи тавофуқоти ҳосилшуда, соли ҷорӣ аз Русия ба Тоҷикистон бояд 830 ҳазор тонна маҳсулоти нафтӣ бидуни пардохти боҷи содиротӣ интиқол дода шавад.

Соли 2014 тавозуни индикативӣ барои Тоҷикистон 1 млн. тонна муқаррар шуда, аммо ба ҷумҳурӣ муяссар гардид, ки ҳамагӣ каме бештар аз нисфи ин миқдор маҳсулоти нафтиро аз Русия дастрас намояд.