Узви Шӯрои сиёсии ҲНИТ Саидиброҳими Назар, номзад ба вакилии МН МО ҶТ аз ҳавзаи интихоботии якмандатии Кӯлоб рақами 37 оид ба қайчӣ кардани барномааш дар Шабакаи аввал ба унвони Шермуҳаммади Шоҳиён, раиси КМИР бо аризаи шикоятӣ муроҷиат кард.

Бино ба иттилои сомонаи расмии ҲНИТ, дар ариза С.Назар зикр мекунад, ки рӯзи 16 феврал ӯ тариқи Шабакаи якуми Телевизиони Тоҷикистон суҳбати 20 дақиқаи худро анҷом дода, аммо,  телевизион шоми ҳамон рӯз суҳбаташро ба муддати 14,5 дақиқа пахш ва миқдори 5,5 дақиқаи онро бе ризояти ӯ буридааст.

Дар ариза аз раиси КМИР хоҳиш мешавад, ки сабаби кам кардани вақти кунунии барои номзадҳо ҷудошуда муайян ва вақти истифоданакардаи ӯ тибқи қонун ҷудо карда шавад.