Нахуствазири Тоҷикистон Қоҳир Расулзода рӯзи 18 феврал оид ба ҷамъбасти натиҷаҳои фаъолияти низоми бонкии кишвар дар соли 2014 ва вазифаҳои ин сохтор дар соли равон машварати корӣ баргузор намуд.

Тавре сармушовири хадамоти матбуоти президенти ҶТ Субҳиддин Муҳиддинов ба «Азия-Плюс» дар ин робита иттилоъ дод, дар машварат зикр гардид, ки сарфи назар аз таъсирҳои молӣ ва иқтисодии беруна, кори низоми бонкии ҷумҳурӣ дар соли гузашта устувор буд

«Дар машварат пешниҳод шуд, ки  дар назди ҳукумати кишвар  Шӯро оид  ба  рушди  низоми  бонкӣ таъсис дода шуда, барои муқовимат бо омилҳои берунӣ низоми бонкӣ такмил дода шавад», - иброз дошт ӯ.

Ба гуфтаи сармушовир, иштирокдорони машварат масъалаҳои таҳкими ҳамкорӣ бо бонкҳои хориҷӣ, афзоиши ҷалб сармоя, қарздиҳии хурду миёна ва маблағгузорӣ ба бахшҳои истеҳсолиро баррасӣ намуданд.

«Нахуствазир ба сохтору шахсони масъул дастур дод, ки барои фаъолияти устувори низоми бонкӣ тадбирҳои зарурӣ андешида, бо назардошти пешниҳодҳои дар машварат ироашуда, нақшаи чорабиниҳо таҳия намоянд», - афзуд номбурда.