Аз ҳавзаи якмандатии интихоботии №19 Конибодом се нафар баҳри ба даст овардани курсии вакилӣ дар палатаи поёнии парлумон рақобатро идома медиҳанд.

Тавре як манбаъ аз КМИР Тоҷикистон иттилоъ дод, ду нафар номзади қаблан сабтшуда дар ин ҳавза – номзади Ҳизби аграрӣ Аҳмадҷон Неъматов ва намояндаи ҲХДТ Баҳобир Саидов, ки тариқи худпешбарӣ номнавис шуда буданд, аз рақобат даст кашида, номзадии худро бозпас гирифтанд.

«Акнун барои ба даст овардани эътимоди мардум аз ин ҳавза намояндаи аз ҷониби ҲХДТ пешбаришуда, полковники милиса Равшан Раҷабов, муовини раиси ҲСДТ, доктори улуми ҳуқуқшиносӣ Шокирҷон Ҳакимов ва узви ҲХДТ, ҳунарманди театр Дилбар Сулаймонова, ки тариқи худпешбарӣ сабт шудаанд, рақобатро идома хоҳанд дод», - афзуд манбаъ.