Раиси Комиссияи марказии интихобот ва раъйпурсӣ (КМИР)-и Тоҷикистон Шермуҳаммади Шоҳиён пагоҳ, 24 феврал ҷаласаи васеи КМИР-ро доир менамояд, ки дар он гурӯҳи охирини нозирони байнулмилалӣ дар интихоботи парлумонии санаи 1-уми март таъиншуда расман ба қайд гирифта мешаванд.

Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки шумори нозироне, ки дар ҷаласаи мазкур ба қайд гирифта мешаванд, дақиқ маълум нест ва ин масъала то шоми имрӯз мувофиқа хоҳад шуд.

«То имрӯз КМИР Тоҷикистон дар маҷмӯъ 427 нафар намояндагони Дафтари институтҳои демократия ва ҳуқуқи башари Созмони амнияту ҳамкории Аврупо (ДИДҲБ/САҲА/), Ассамблеяи байнипарлумонии ИДМ, Созмони ҳамкории Шанхай, ИДМ ва кишварҳои ҷудогонаро расман ба сифати нозирони байнулмилалӣ ба қайд гирифт», - гуфт ӯ.

Додозода таъкид дошт, ки дар пайгирӣ (мониторинг)-и интихоботи парлумонии Тоҷикистон аз иштироки беш аз 500 нафар нозирони байнулмилалӣ аз созмонҳои ҷаҳониву минтақавӣ ва кишварҳои ҷудогона интизорӣ меравад.

Зимнан зикр гардид, ки рӯзи чоршанбеи ҳамин ҳафта, 25 феврал КМИР шумори дақиқи нозирони маҳаллии расман сабтшударо эълом хоҳад дошт.