Муовини нахуствазири Тоҷикистон Азим Иброҳим чанде қабл бо корҳои таъмиру бозсозии нақби «Истиқлол» дар роҳи мошингарди Душанбе – Хуҷанд аз наздик шинос шуд.

Сармушовири хадамоти матбуоти президенти ҶТ Субҳиддин Муҳиддинов ба «Азия-Плюс» дар ин робита иттилоъ дод, ки дар маҳалли корҳо муайян карда шудааст, ки мушкилоти асосӣ барои ҳаракати бемамониати нақлиёт дар нақб ҷоришавии обҳо аз қисматҳои гуногун буда, баҳри рафъи мушкилоти зикршуда тамоми техникаву ҳайати коргарон сафарбар гардидаанд.

Ба иттилои манбаъ, ба муовини нахуствазир маълумот дода шудааст, ки айни замон мушкилоти ҷоришавии обҳои зиёдатӣ дар масофаи 2,5 километр ҳал шуда, 636 адад таҷҳизоти равшанидиҳандаи мувақатӣ насб гардидааст.

«Азим Иброҳим ба шахсони масъул дастур дод, ки дар фурсати кӯтоҳтарин барои ҳалли мушкилоти ҷойдошта бо ҷалби мутахассисони ширкати «Зетрон»-и Испания чораҳои таъҷилӣ андешида шаванд», - қайд кард Муҳиддинов.

Зимнан зикр гардид, ки дар машварати ситоди корӣ дастур дода шуд, ки корҳо хушсифат ва бо истифода аз таҷҳизоти зурурӣ анҷом дода шуда, ҳамаи корҳои таъмиру бозсозӣ дар иншооти мазкур то охири сол ба итмом расонида шаванд.