Муовини раиси Ҳизби халқии демократии Тоҷикистон Раънохон Маҳмудзода сафири кабири кишвари Ҷопон  дар Тоҷикистон ҷаноби Такаши Комадаро ба ҳузур пазируфта, бо ӯ мулоқот  анҷом  дод.  

Бино ба иттилои сомонаи расмии ҲХДТ, зимни суҳбат Раънохон Маҳмудзода ба дипломати ҷопонӣ дар бораи ҷараёни омодагӣ ба интихобот, раванди таблиғоти пешазинтихоботӣ ва тарзу  услуби  замонавии  таъсиррасонӣ ба электорат маълумот дода, қайд кард, ки ҲДТТ  фаъолияти  худро дар доираи   қонунҳои  интихоботӣ   роҳандозӣ намуда, аз шароиту  муқаррароте, ки Комиссияи марказии интихобот ва раъйпурсии ҷумҳурӣ   ҷиҳати таблиғоти пешазинтихоботӣ манзур намудааст,  самаранок  истифода  мебарад.

«Дар баробари ин бо табақаҳои мухталифи ҷомеа суҳбату вохӯриҳо ва мулоқотҳои  фаъолони ҳизб ва  номзадҳои онро ба таври густурда ташкил  карда  истодаем. Аз ҳамаи   намудҳои  васоити  ахбори  омма, расонаҳои  интернетӣ  ва  шабакаҳои  иҷтимоии он самарабахш истифода  мебарем. Дар саросари   ҷумҳурӣ   ба  теъдоди  бешаз 1,5 миллион варақаю  мусаввараҳо  ва   шиору   плакатҳоро  паҳн  кардем. Табиист, ки дар чунин ҳолат ҳизби мо фазои иттилоотии мамлакатро бештар фарогир  шудааст», - иброз доштааст Раънохон Маҳмудзода.

Гуфта мешавад, дар навбати худ сафири Ҷопон ба масъалаи иштироки   васеи   мардум дар ин маъракаи   интихоботӣ   таваҷҷуҳ  зоҳир  карда, ҳамзамон  дар мавриди  пешрафтҳои солҳои охири кишвари Тоҷикистон ва таҳкими ҳамкориҳои  миёни ду мамлакат ибрози назар  ва изҳори  боварӣ   намудааст, ки   интихобот   ба таври шаффофу   демократӣ   барпо  мегардад  ва он  барои   рушди демократия  дар  Тоҷикистон   мусоидат   хоҳад    кард.