Комиссияи марказии интихобот ва раъйпурсӣ (КМИР)-и Тоҷикистон пагоҳ, 1 март бо гузашти ҳар 3 соат мустақиман тариқи шабакаҳои телевизиони давлатӣ дар бораи ҷараёни баргузории интихобот ба палатаи поёнии парлумон ба аҳолии кишвар маълумот медиҳад.

Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки маълумоти фаврӣ оид ба рафти интихобот, фоизи иштироки аҳолӣ дар он соатҳои 9, 12, 15 ва 18-и рӯз тавассути шабакаҳои телевизион ба мардум пешниҳод мегардад.

Ёдрас мекунем, ки пагоҳ, 1 март дар Тоҷикистон маъракаи интихоботи вакилон ба падлатаи поёнии парлумон ва маҷлисҳои маҳаллии вакилони халқ доир мегардад. Дар тамоми маҳаллаҳои аҳолинишини кишвар ва ҳамчунин намояндагиҳои дипломатии Тоҷикистон дар хориҷи мамлакат қитъаҳои овоздиҳӣ аз соати 06-00 то 20-00-и рӯз боз хоҳанд буд.