Раиси Ҳизби демократи Тоҷикистон (ҲДТ) Саидҷаъфар Исмонов пирӯзиаш дар интихобот ба палатаи поёнии парлумонро изҳор намуд.

Раиси ҲДТ ба «Азия-Плюс» дар ин робита изҳор дошт, ки дар ин маърака беш аз 77%-и интихобкунандагон ба ҷонибдории ӯ овоз додаанд. «Ба ман аз ҳавзаи якмандатии интихоботии Фархор №34 занг зада, бо ғалаба табрик карданд», - иброз дошт ӯ.

Ёдрас мекунем, ки чанд рӯз қабл аз интихобот се нафар номзадҳои расман сабтиномшуда аз ҳавзаи якмандатии интихоботии Фархор №34 якбора номзадии худро бозпас хонда, аз рақобати минбаъда даст кашиданд. Инҳо номзади Ҳизби аграрӣ Нуриддин Азматов, намояндаи Ҳизби халқии демократӣ Сафаралӣ Шарифов ва номзади худпешбаришуда Мавлонбӣ Тӯраева мебошанд.

Дар ин ҳавза барои курсии вакилӣ раиси ҲДТ Саидҷаъфар Исмонов, номзади ҲНИТ Зайниддин Юсуфов ва номзади худпешабришуда Юсуфхон Сайфиддинов рақобат карданд.