Муовини ректори Донишгоҳи миллии Тоҷикистон (ДМТ) Бахтовар Сафарови 31-сола дар маъракаи интихобот аз ҳавзаи интихоботии Вахш-32 пирӯзӣ ба даст овард.

Раиси ҳавзаи интихоботии Вахш-32 Неъмат Зардиев ба «Азия-Плюс» дар ин робита иттилоъ дод, ки номзади ҲХДТ Бахтовар Сафаров бо касби 89,3%-и раъйи интихобкунандагон ғолиб дар ин ҳавза эътироф шуда, рақибони ӯ аз ҲНИТ Қиёмиддин Авазов - 4,5% ва номзади худпешбаришуда Қурбоналӣ Шарипов - 5,4%-и овозҳои интихобкунадагонро соҳиб шудаанд.

Ба иттилои манбаъ, аз ҳеҷ кадоме аз аҳзоби сиёсӣ ва нозирон дар ин ҳавзаи интихоботӣ ягон шикоят ба ҳавза ворид нашудааст.

Бахтовар Сафаров номзади улуми ҳуқуқшиносӣ, муовини ректори ДМТ буда, тибқи маълумоти пешакӣ, яке аз вакилони ҷавони парлумони оянда ба шумор меравад.