Зимни мулоқоти раиси Палатаи савдо ва саноати Тоҷикистон (ПСС ҶТ) Шариф Саид бо ҳайати ПСС Афғонистон таҳти сарварии ноиби президенти Палатаи кишвари ҳамсоя Хон Ҷон Алоказай дар Душанбе оид ба дар моҳи августи соли равон дар пойтахти Тоҷикистон баргузор намудани намоишгоҳи «Дастовардҳои иқтисодии Афғонистон» тавофуқ ҳосил шуд.

Бино ба иттилои хадамоти матбуоти ПСС ҶТ, дар ҷараёни мулоқот ҷонибҳо масъалаҳои вазъи кунунӣ ва дурнамои рушди ҳамкориҳои дуҷонибаи тиҷоративу иқтисодиро баррасӣ намуда, зикр гардид, ки ахиран шумори соҳибкорони афғон дар бозори Тоҷикистон афзуда, айни замон дар кишвари мо 85 адад корхонаҳои Афғонистон фаъолият доранд.

Тибқи маълумоти Агентии омори назди президенти ҶТ, соли 2014 ҳаҷми муомилоти молӣ миёни Тоҷикистону Афғонистон ҳудуди 106 млн. доллари ИМА-ро ташкил додааст, ки нисбат ба нишондиҳандаи соли 2013 ба андозаи 10,8% камтар аст. Дар ҳаҷми муомилоти молии соли гузашта миёни кишварҳо каме бештар аз 52 млн. доллари ИМА ба воридоти молҳои Афғонистн ба Тоҷикистон рост меояд.