Нимаи дуюми рӯзи 2 апрел дар Вазорати саноат ва технологияҳои нави Тоҷикистон вохӯрии вазири саноат ва технологияҳои нави ҶТ Шавкат Бобозода бо намояндаи тиҷоратии Русия дар Тоҷикистон Михаил Кораблин, роҳбарони ширкатҳои ҶСП «Тролза» Сергей Ключарев ва ҶСП «Электротехническая компания «Плутон» Александр Савостьянов, ҳамчунин директори генералии КВД «Насби нақлиёти барқӣ ва велосипед» Ф.Саидов баргузор гардид.

Бино ба иттилои хадамоти матбуоти Вазорати мазкур, зимни мулоқот мухокима оид ба масъалаҳои ҳамкориҳои дуҷониба дар соҳаи мошинсозӣ ҷиҳати ҷамъу васл кардани троллейбусҳо ва минбаъд тақвили онҳо ба Ҷумҳурии Афғонистон мавриди баррасӣ қарор дода шуданд.

 Гуфта мешавад, дар тақвияти муҳокимаи масъалаҳои дуҷониба, ҷонибҳо оид ба роҳҳои ҳалли як қатор масъалаҳои ҳалталаби ҷойдошта ибрози ақида намуда, аз натиҷаҳои вохӯрӣ изҳори қаноатмандӣ намуданд

Зимнан зикр мегардад, ки ҷонибҳо ҳамчунин омодагӣ изҳор намуданд, ки ба идомаи раванди мусбии робитаҳои гуногунҷабҳаи Тоҷикистону Русия рушди нав бахшида, ба муносибатҳои минбаъдаи дуҷониба ва ҳамкориҳоро дар доираи созмонҳои байналмилалӣ боз ҳам таҳкиму густариш мебахшанд.