Рӯзи панҷшанбеи ҳафтаи равон дар Душанбе таҳти раёсати муовини аввали вазири рушди иқтисод ва савдои Тоҷикистон Саидраҳмон Назриев ҷаласаи навбатии дурӯзаи Гурӯҳи корӣ байни намояндагони ҷумҳуриҳои ҳамҷавори Тоҷикистон, Афғонистон ва Покистон ба кор шурӯъ намуд.

Бино ба иттилои хадамоти матбуоти Вазорати рушди иқтисод ва савдои ҶТ, дар ҷаласа Созишномаи тиҷорати транзитӣ байни ҳукуматҳо Покистон, Афғонистон ва Тоҷикистон мавриди баррасӣ ва мувофиқа қарор мегирад.

Гуфта мешавад, санади дахлдор вобаста ба лоиҳаи Созишномаи мазкур баъди анҷоми ҷаласаи Гурӯҳи корӣ, имрӯз 10 апрел қабул карда мешавад.

Ба гуфтаи Саидраҳмон Назриев, ин санад ба таҳкими ҳамкориҳои тиҷоратӣ миёни кишварҳо мусоидат намуда, долони нақлиётӣ, ки дар лоиҳа пешбинӣ шудааст, сатҳи тиҷорати минтақавӣ ва ҳаҷми ҷалби сармоягузориҳои хориҷиро бамаротиб меафзояд.