Ба ҳолати 1-уми апрели соли 2015 дар ҳамаи бахшҳои хоҷагии вилояти Суғд саршумори чорвои калон 600,1 ҳазор сарро ташкил кардааст, ки нисбати ҳамин давраи соли гузашта 28,5 ҳазор сар ё 5 фоиз зиёд аст.

Бино ба иттилои хадамоти матбуоти раиси вилояти Суғд, дар ҳамин давра саршумори гӯсфанду буз 44,6 ҳазор сар ё 3,3 фоиз ва саршумори мурғ 150,7 ҳазор сар ё 10,9 фоиз афзудааст.

Аз саршумори умумӣ 92,5 фоизи саршумори чорвои калон ва 84,6 фоизи саршумори гӯсфанду буз ба хоҷагиҳои аҳолӣ рост меояд.

Афзоиши саршумори чорвои калон дар хоҷагиҳои ноҳияи Ғончӣ – 18,1 фоиз,  Мастчоҳ – 6,8 фоиз, Кӯҳистони Мастчоҳ – 6,2 фоиз, Спитамен – 5,8 фоиз, Панҷакент – 4,9 фоиз, Истаравшан  – 4,1 фоизро ташкил додааст.

Тавре ба «Азия-Плюс» аз Раёсати кишоварзии вилоят хабар доданд, дар ин давра истеҳсоли гӯшт дар ноҳияи Ашт ба миқдори 27,1%, Конибодом - 15%, Исфара - 1,2%, Бобоҷон Ғафуров - 8,8%, Айнӣ - 6,2%, Шаҳристон - 4,6% ва Мастчоҳ - 3,8% зиёд шуда, ҳаҷми умумии истеҳсоли гӯшт дар вилоят дар семоҳаи аввал 9 ҳазору 555 тоннаро ташкил додааст, ки нисбат ба ҳамин давраи соли гузашта 8,4% зиёд аст.

Семоҳаи аввал истеҳсоли шир дар вилоят дар ноҳияҳои Зафаробод - 9,2%, Ғончӣ - 8,4%, Бобоҷон Ғафуров - 8,1%, Конибодом - 5,6%, Мастчоҳ - 5,3%, Исфара - 3,5%, Айнӣ - 2,9% ва Истравшан - 2% афзуда, дар маҷмӯъ 59355,7 тоннаро ташкил додааст, ки дар муқоиса бо ҳамин давраи соли гузашта 2,6% бештар аст.