Зимни мулоқоти вазири рушди иқтисод ва савдои Тоҷикистон Неъматулло Ҳикматулозода бо сафири ИМА дар ҶТ хонум Сюзан М.Эллиотт, ки ахири ҳафтаи гузашта доир гардид, вазъи кунунӣ ва дурнамои ҳамкориҳои мутақобилан судманди иқтисодӣ байни Тоҷикистон ва Иёлоти Муттаҳидаи Амрико баррасӣ шуданд.

Бино ба иттилои хадамоти матбуоти Вазорати рушди иқтисод ва савдои ҶТ, ҳангоми мулоқот  ҷонибҳо атрофи вазъи иқтисодию иҷтимоии кишвар, таъмини суботи макроиқтисодӣ, раванди ислоҳоти иқтисодӣ, ҷараёни мувофиқа ва татбиқ намудани барномаҳои сатҳи минтақавӣ, тақвияти иқтидори содиротӣ, фаъолияти ширкатҳои амрикоӣ дар кишвар, ҷалби сармоягузорӣ, ҳамчунин масъалаҳои муҳоҷирати меҳнатӣ ва шуғли аҳолӣ мубодилаи афкор намуданд.

Гуфта мешавад, дар интиҳои вохӯрӣ тарафҳо азми қавии худро ҷиҳати густариши минбаъдаи ҳамкориҳо дар самтҳои гуногун баён доштанд.

Тибқи маълумоти Агентии омори назди президенти ҶТ, семоҳаи аввали соли равон ҳаҷми муомилоти молӣ миёни Тоҷикистону ИМА каме бештар аз 5,6 млн. доллари ИМА-ро ташкил додааст, ки нисбат ба нишондиҳандаи ҳамин давраи соли гузашта қариб ба андозаи 80% камтар аст.

Дар ҳамин ҳол, тӯли чандин сол ИМА яке аз кишварҳои асосии мададрасони Тоҷикистон маҳсуб меёбад. Аз ҳаҷми умумии кумаки башардӯстона, ки семоҳаи аввали соли ҷорӣ ба Тоҷикистон расонида шудааст, ҳудуди 25% ба ИМА рост меояд.