Бонки Эсхата аз санаи 15-уми апрели соли ҷорӣ фоизи қарзҳои бо доллар пешниҳодшавандаро барои ҳама намуди қарзҳо паст намуд. Қарор аз тарафи Раёсати Бонки Эсхата рӯзҳои наздик қабул карда шуд.

«Қарори мазкур бо мақсади дастгирии мизоҷони бонк, дар марҳилаи душвори буҳрони иқтисодӣ ва ноустувории қурби асъор қабул карда шуд. Дар ин ҳолат, таҳлили амиқ ва имкониятҳои бонк ба назар гирифта шуда, аъзоёни Раесат бо ҳамраъйӣ барои паст  кардани фоизҳои солонаи қарзҳои бо доллар пешниҳодшаванда ба миқдори 2% овоз доданд», - қайд кард Раиси Раёсати бонк Хуршед Носиров.

Ҳамин тавр, агар қаблан фоизи қарз барои пахтакорӣ ва коркарди он 24-22% солонаро ташкил мекард, ҳоло бошад фоизи он то 22-20% паст карда шудааст. Фоизи қарзи ипотекӣ низ паст карда шуда, ҳоло 20% солонаро ташкил медиҳад. Қарзи «Манзилӣ» бошад, ки барои таъмир ва сохтани хона пешниҳод гашта фоизаш 26% солона буд, акнун бо 24% солона пешниҳод мегардад.

Қарзҳое, ки дар доираи лоиҳаи иҷтимоӣ-экологӣ барои пармакунии чоҳҳо, сохтани гармхонаҳо ва обёрии қатрагӣ дода мешаванд, акнун 18% солонаро ташкил медиҳад, ки  қаблан 22% ро ташкил дода буд.

Бояд қайд намуд, ки самти қарздиҳӣ сол аз сол яке аз самтҳои афзалиятноки Бонки Эсхата ба ҳисоб рафта, мунтазам рушди ин соҳаро пеша намудааст.