Имрӯз, 28 апрел дар шаҳри Душанбе ҷаласаи дурӯзаи Комиссияи байниҳукуматии Тоҷикистону Туркманистон оид ба ҳамкориҳои тиҷоративу иқтисодӣ ва илмиву техникӣ ба кор шурӯъ кард.

Аз Вазорати энергетика ва захираҳои оби ҶТ ба «Азия-Плюс» дар ин робита иттилоъ доданд, ки барои иштирок дар кори ҷаласаи шашуми ин комисссия ҳайати Туркманистон таҳти раҳбарии вазири молияи ин кишвар Муҳаммедгули Муҳаммедов ба Душанбе ташриф овардаанд.

Дар ҷаласаи дурӯза ҳайати Тоҷикистонро вазири энергетика ва захираҳои оби ҷумҳурӣ Усмоналӣ Усмонзода роҳбарӣ мекунад. Аз рӯйи натиҷаҳои ҷаласа имзои санади дахлдор дар назар аст.

Ёдрас мекунем, ки ҷаласаи панҷуми Комиссияи байниҳукуматии Тоҷикистону Туркманистон оид ба ҳамкориҳои тиҷоративу иқтисодӣ ва илмиву техникӣ 21 апрели соли гузашта дар Ашқобод баргузор шуда буд.

Бино ба маълумоти Агентии омори назди президенти ҶТ, соли гузашта ҳаҷми муомилоти молӣ миёни Тоҷикистону Туркманистон беш аз 110 млн. доллари ИМА-ро ташкил дод, ки нисбат ба нишондиҳандаи соли 2013 қариб 8% камтар аст.

Семоҳаи аввали соли равон ҳаҷми муомилоти молӣ миёни Тоҷикистону Турманистон ҳудуди 25 млн. доллари ИМА-ро ташкил дод, ки нисбат ба ҳамин давраи соли гузашта 68% зиёдтар аст.