Вакилони палатаи поёнии ҷумҳурӣ фармони президенти мамлакат дар бораи раиси Бонки миллии Тоҷикистон (БМТ) таъин шудани Ҷамшед Нурмаҳмадзодаро якдилона дастгирӣ карданд.

Дар ҷараёни ҷаласаи имрӯзаи палатаи поёнии парлумон раиси тозатаъини БМТ ба саволҳои вакилони мардумӣ оид ба тадбирҳои роҳандозишуда дар самти устувор кардани қурби арзи миллӣ (сомонӣ) нисбат ба асъори хориҷӣ ва ҳамчунин қарори собиқи раҳбарияти Бонки миллӣ доир ба қатъи фаъолияти як қатор нуқтаҳои мубодилаи асъор посух гуфт.

Нурмаҳмадзода қайд кард, ки бо қарори раҳбарияти БМТ аз 17 апрели соли равон, дар саросари кишвар фаъолияти 1,5 ҳазор адад нуқтаҳои мубодилаи асъор қатъ гардид, ки 800 адади он ба шахсони воқеъӣ таллуқ доштанд.

Раиси нави БМТ таъкид дошт, ки барои ошкор кардани паҳлӯҳои мусбат ва манфии қарори мазкур барои ӯ вақт лозим аст ва дар ҳамин ҳол, илова намуд, ки айни замон бонкҳои кишвар нуқтаҳои мубодилаи асъори иловагӣ боз мекунанд.

Нурмаҳмадзода ба вакилон итминон дод, ки қурби арзи миллӣ нисбати доллари ИМА тадриҷан устувор мешавад.

Ҳамчунин ӯ зикр кард, ки «тибқи маълумоте, ки БМТ дар ихтиёр дорад, нисбат ба моҳи марти соли ҷорӣ, моҳи апрели соли равон ҳаҷми интиқоли маблағҳои пулии муҳоҷирони корӣ аз Русия каме афзудааст», вале аз рақамҳои мушаххас дар ин маврид маълумот надод.

Акс аз радиои Озодӣ