Палатаи поёнии парлумони ҷумҳурӣ дар ҷаласаи имрӯзаи худ Созишнома бо Созмони умумиҷаҳонии савдо (СУС) дар бораи соддакунии расмиёти савдоро тасдиқ кард.

Зимни суханронӣ назди вакилон доир ба ин масъала муовини аввали вазири рушди иқтисод ва савдои ҶТ Сайраҳмон Назриев қайд кард, ки дар Созишнома соддакунии расмиёти таҳияи ҳуҷҷатҳо барои ҳамлу нақли молу борҳои содиротӣ, воридотӣ ва транзитӣ пешбинӣ шудааст.

«Ин тадбирҳо ба коҳиши хароҷот барои ҳамлу нақл ва сарфаи вақти расонидани молу борҳо имкон медиҳад. Ҳамин тариқ, хароҷоти содиркунандагон ва воридкунандагони мол ба андозаи 13-15% кам мешавад. Ҳамзамон ин тадбир ба поинравии нархҳо ба молҳои воридотӣ дар кишварҳои узви СУС низ мусоидат мекунад», - иброз дошт ӯ.

Муовини аввали вазир ҳамчунин зикр кард, ки таъсиси Равзанаи ягона ба бартараф шудани фарқияти маълумотҳо дар бораи ҳаҷми муомилоти мол бо шарикони тиҷоратӣ низ мусоидат хоҳад кард.