Сафири Тоҷикистон дар Шоҳигарии Арабистони Саудӣ Аъзамшо Шарифӣ дар  шаҳри Ҷидда бо раиси Бонки исломии рушд (БИР) Аҳмад Муҳаммад Алӣ мулоқот анҷом дод.

Бино ба иттилои Вазорати корҳои хориҷии ҶТ, дар мулоқот масъалаҳои ҳамкории Тоҷикистон ва Бонки исломии рушд дар заминаҳои гуногун баррасӣ гардида, ҷонибҳо бо изҳори қаноатмандӣ аз натиҷаҳои ҳамкории босамари бисёрсола, омодагии худро ба татбиқи лоиҳаҳои нави муҳимми зербиноӣ таъкид намуданд.

Гуфта мешавад, сафири Тоҷикистон бо назардошти аҳаммияти глобалии мавзӯи об, раиси БИР-ро бо аҳдоф ва мӯҳтавои Конфронси байналмилалии сатҳи баланд роҷеъ ба натиҷаҳои татбиқи даҳсолаи байналмилалии амал «Об барои ҳаёт» 2005-2015  шинос намуда, ба ӯ маводди муаррифиро тақдим кард.

Зимнан зикр мегардад, ки доктор Аҳмад Муҳаммад Алӣ ба ҳукумати Тоҷикистон барои даъват ба Конфронси об изҳори миннатдорӣ намуда, таъкид дошт, ки Бонки исломии рушд дар ин чорабинӣ дар сатҳи баланд иштирок хоҳад кард.