Дар Тоҷикистон беш аз 1 ҳазор нафар ба мубориза бо ҳуҷуми малахҳо ба боғу киштзор сафарбар шуданд.

Бино ба иттилои Вазорати кишоварзии ҶТ, айни замон майдони умумии фарогири малах дар ҷумҳурӣ беш аз 79,3 ҳазор гектарро ташкил медиҳад.

Гуфта мешавад, ҳуҷуми малахҳо бештар дар минтақаи ҷануб - вилояти Хатлон ба мушоҳида мерасад, ки он майдони умумии зиёда аз 40,4 ҳазор гектарро фаро гирифта, дар вилояти Суғд малахҳо ба 20 ҳазор гектар майдони кишт ҳуҷум кардаанд.

Зимнан зикр мегардад, ки майдони умумии то имрӯз бо маҳсулоту заҳрҳои зидди малахи кимиёвӣ коркардшуда дар боғу киштзорҳои фарогири он зиёда аз 55,3 ҳазор гектарро ташкил дода, барои анҷоми ин кор аз 51 адад тракторҳо ва аэрозол, 498 адад чангпошакҳои дастӣ ва муҳаррик истифода шудааст.