Нахуствазири Тоҷикистон Қоҳир Расулзода рӯзи 15 июн бо ҷараёни корҳои сохтмони Маркази барқу гармидиҳӣ (МБГ)-и Душанбе-2 шинос шуд.

Сармушовири хадамоти матбуоти президенти ҶТ Субҳиддин Муҳиддинов ба «Азия-Плюс» дар ин робита иттилоъ дод, ки навбати дуюми марказии барқу гармидиҳии мазкур бар пояи созишномаи қаблан баимзорасида миёни ҳукумати Тоҷикистон ва «Эксимбонк»-и Чин сохта мешавад.

Нахуствазир ҳамроҳ бо мутахассисони ширкати ТВЕА бо қисматҳои ҷудогонаи сохтмон, ки дар он таҳкурсии навбати дуюми МБГ бунёд мегардад, аз наздик ошно гардид.

Расулзода ба масъулин ва сохторҳои дахлдор дастур дод, ки ба сифати корҳои иҷромешуда таваҷҷуҳи хосса зоҳир намоянд.

Мутахассисони иншоот ба нахуствазир маълумот доданд, ки навбати дуюми МБГ Душанбе-2 зимистони соли 2016 ба истифода дода мешавад.

«Аз паёми президенти Тоҷикистон Эмомалӣ Раҳмон чунин бармеояд, ки муддати се соли оянда иқтидори МБГ Душанбе-2 аз 100 МВт ҳозира бояд то ба 400 МВт расонида шавад», - қайд кард Муҳиддинов.