Муовини нахуствазири Тоҷикистон Азим Иброҳим чанде қабл бо ҷараёни корҳо дар сохтмони нақбҳои қитъаи роҳи оҳани Ваҳдат - Ёвон шинос шуд.

Сармушовири хадамоти матбуоти президенти ҶТ Субҳиддин Муҳиддинов ба «Азия-Плюс» дар ин робита иттилоъ дод, ки айни замон корҳои нақбканӣ дар нақби якум бо масофаи 2,68 км аз ду ҷониб оғоз гардида дар нақби дувум бо дарозии 680 м корҳои нақбканӣ танҳо аз як самт оғоз гардидааст ва барои оғози бунёди нақби сеюм, ки дарозии он 735 м мебошад корҳои омодагӣ идома доранд.

Сарфи назар аз идомаи корҳо дар маҳалли сохтмон, муовини нахуствазир аз суръати корҳо нигаронӣ изҳор намуда, назди роҳбарият ва шахсони масъул ҷиҳати суръатбахшӣ ба корҳо ва хушсифат анҷом додани он дастурҳои мушаххас гузошт.

Муовини нахуствазири ҷумҳурӣ зимни сафар ҳамчунин бо рафти корҳои сохтмони корхонаи истеҳсоли сементи «Моҳира», ки иқтидори солонаи он ба истеҳсоли 1,2 млн. тонна семент баробар хоҳад буд, низ аз наздик ошно гардид.