Рӯзи 17 июни соли 2015 мулоқоти вазири корҳои хориҷии Тоҷикистон Сироҷидин Аслов бо ноиби президенти Бонки Ҷаҳонӣ оид ба минтақаи Аврупо ва Осиёи Марказӣ Лора Так барпо гардид.

Бино ба иттилои Вазорати корҳои хориҷии ҶТ, зимни мулоқот ҳамкории Тоҷикистон ва Бонки Ҷаҳонӣ, аз ҷумла дастгирии рушди иқтисодӣ ва иҷтимоии кишвар баррасӣ гардида, ҷонибҳо аҳамияти ҳамкориҳои минтақавӣ, бахусус лоиҳаи CASA-1000 ва пайгирии стратегияи ҳамкории Бонкро таъкид намуданд.

Гуфта мешавад, ҳамин рӯз Сироҷидин Аслов  ҳамчунин бо раиси зеркумита оид ба масъалаҳои Аврупо ва АвруОсиёи Кумитаи байналмилалии Палатаи намояндагони Конгресси ИМА Дана Роҳрабахер дидору гуфтушунид карда, дар рафти мулоқот як қатор масъалаҳои мубрами ҳамкориҳои дуҷониба, аз ҷумла лағви иловаи Ҷексон-Веник нисбати Тоҷикистон ва инчунин масъалаҳои амнияти минтақавӣ ва байналмилалӣ мавриди муҳокима қарор гирифтанд.