Як ҳайати Чин аз корхонаи муштараки «Тоҷик Азот»-и шаҳри Сарбанд боздид карданист. Сомонаи маъмурияти вилояти Хатлон дар ин робита иттлоъ медиҳад, ки ин боздид рӯзҳои 21-22 июн сурат мегирад.

Ҳадаф аз сафари ҳайати Чин дар торнамо шиносоии наздик бо вазъ дар корхона, имкони сармоягузорӣ ва роҳандозии истеҳсоли нуриҳои минералӣ дар он унвон шудааст.

Дар худи корхона ташрифи қарибулвуқӯъи меҳмонони хориҷиро тасдиқ намуда, изҳор доштанд, ки алҳол танҳо сари сафари шиносоӣ бо корхона сухан меравад.

«Барои барқарор намудани фаъолияти корхонаи мазкур мебояд молики онро даъват намуда, андешаи ӯро ба инобат гирифт, ҳарчанд суд қарор кард, ки корхона ба молики пештарааш баргардонида мешавад. Ин кори осоне нест. Аммо барои ин нахуст қарори ҳукумати ҶТ «Дар бораи таъсиси КМ «Тоҷик Азот»-ро бекор кардан лозим аст. Ин ҳайати якуме нест, ки аз корхонаи мо боздид мекунад. Аллакай якчанд ҳайатҳо ба корхонаи мо ташриф оварданд, вале ҳеҷ натиҷае ҳосил нашуд», - гуфт як манбаъ дар КМ «Тоҷик Азот».