Палатаи поёнии парлумон имрӯз, 24 июн Созишнома тариқи мубодилаи мактубҳо байни ҳукумати Тоҷикистон ва ҳукумати Чин дар бораи лоиҳаи татбиқи корҳои таъмирию барқарорсозии роҳҳои дохилишаҳрии шаҳрҳои Қӯрғонтеппа ва Кӯлобро тасдиқ кард.

Зимни суханронӣ назди вакилон оид ба ин масъала муовини вазири молия Меҳринамо Ҷонмаҳмадова изҳор намуд, ки  барои иҷрои корҳои таъмир дар ин роҳҳои ду шаҳри минтақаи ҷануби ҷумҳурӣ ҷониби Чин ба сифати бурс 60 млн. юан ҷудо мекунад.

«Дар тендери баргузоршуда аз рӯйи ин лоиҳа ширкати Чин ғолиб омада, ба таъмири хушсифати 6 километрӣ роҳҳои мошингард дар шаҳрҳои Қӯрғонтеппа ва Кӯлоб уҳдадор шуд», - иброз дошт муовини вазир.

Ба гуфтаи ӯ, дар навбати худ Тоҷикистон уҳдадор мешавад, ки ҳангоми иҷрои корҳо ва воридоти техникаву таҷҳизот, ширкати чинӣ аз пардохти андоз аз арзиши иловашуда ва боҷи гумрукӣ озод карда мешавад.