Палатаи поёнии парлумони ҷумҳурӣ рӯзи 24 июн Созишномаи бурсии ҳанӯз моҳи феврали соли равон баимзорасида байни Тоҷикистон, КВД «Хоҷагии манзилию коммуналӣ» ва Бонки аврупоии таҷдид ва рушд (БАТР) оид ба лоиҳаи беҳтар намудани системаи обтаъминкунии чанде аз шаҳру ноҳияҳои Тоҷикистонро тасдиқ кард.

Зимни суханронӣ назди вакилон оид ба ин масъала муовини вазири молияи кишвар Меҳринамо Ҷонмаҳмадова қайд кард, ки барои амалисозии лоиҳа БАТР ба сифати бурс (грант) 2,7 млн. доллари ИМА ҷудо мекунад.

Ӯ ба вакилон хотирррасон намуд, ки қаблан БАТР барои амалисозии лоиҳаи мазкур ба сифати қарзи имтиёзнок 10 млн. доллари ИМА ва боз 10 млн. доллари ИМА ба сифати бурс ихтисос дода буд ва ҳамин тариқ, маблағи умумие, ки Бонк барои ин лоиҳа ҷудо мекунад, 22,7 млн. доллари ИМА-ро ташкил медиҳад.

«Амалисозии лоиҳа ахири соли 2016 ба итмом расида, он шаҳрҳои Қайроққум, Исфара, Конибодом, Хоруғ, Чкаловск, Истиқлол ва ҳамчунин ноҳияи Бобоҷон Ғауровро фаро мегирад», - изҳор дошт Ҷонмаҳмадова.