Бақияи умумии қарзҳо дар бонкҳои Тоҷикисон дар интиҳои моҳи майи соли равон беш аз 11 млрд. сомониро ташкил дод, ки нисбат ба ҳамин давраи соли гузашта 28,7 фоиз зиёд аст.

Бино ба иттилои дафтариматбуоти Бонки миллии тоҷикистон, дар таркиби бақияи қарзҳо 47,2 фоиз ё беш аз 5,2 млрд. сомониро қарзҳои кӯтоҳмуддат ва 52,8 фоиз ё зиёда аз 5,8 млрд. сомониро қарзҳои дарозмуддат ташкил медиҳанд.

«Фоизҳои миёнавазни қарзҳо дар низоми бонкии кишвар дар панҷ моҳи сипаришуда дар қиёс ба ҳамин давраи соли қаблӣ бо пули миллӣ ба 1,96 банди фоизӣ ва бо асъори хориҷӣ ба андозаи 2,56 банди фоизӣ паст шуданд», - таъкид мешавад дар маълумот.

Гуфта мешавад, ҳаҷми қарзҳои хурди додашуда дар муқоиса ба ҳамин давраи соли гузашта 6,5 фоиз афзуда, аз ин маблағ 471,9 млн. сомонӣ ба навоҳии дурдасти кӯҳистон қарзҳои хурд дода шудаанд, ки нисбати ҳамин давраи соли гузашта 3,4 фоиз зиёд мебошад.