Дар гузориши навбатии «Макромониторинги ИДМ», ки аз ҷониби Раёсати таҳлилии Бонки авруосиёии рушд (БАОР) ба чоп расид, гуфта мешавад, дар муқоиса бо ҳамин давраи соли гузашта, аз рӯйи натиҷаҳои семоҳаи аввали соли ҷорӣ ҳаҷми Маҷмӯи маҳсулоти дохилӣ (ММД)-и умумии кишварҳои узви Иттиҳоди Давлатҳои Мустақил (ИДМ) коҳиш ёфт.

Тибқи маълумоти гузориш, ин тамоили манфӣ дар ММД бар асари афтиши иқтисоди Русия, Беларус ва Украина ва ҳамчунин сустшавии рушди иқтисоди Қазоқистону Арманистон ва Тоҷикистон сурат гирифт.

Гуфта мешавад, ин ҷо Қирғизистону Молдова ва Озарбойҷон истисно мебошанд, ки бо сабабҳои гуногун дар иқтисоди онҳо тамоили рушд ба назар мерасад. Дар иқтисоди Туркманистону Ӯзбекистон сатҳи рушд дар мизони семоҳаи охири соли гузашта боқӣ мондааст.

«Дар сурати 60 доллар ба ҳисоби миёна боқӣ мондани нархи нафти Brent дар соли 2015 ва болоравии он то 70 доллар дар соли 2016, метавон пешгӯӣ намуд, ки соли 2015 ҳаҷми ММД-и умумии кишварҳои узви ИДМ 2-3% поин рафта, соли 2016 ба андозаи 1,5-2,5% афзоиш меёбад», - қайд мекунанд муллифони гузориш.