Дар шаҳри Душанбе ҷаласаи дуюми Комиссияи байниҳукуматии Тоҷикистону Молдова оид ба ҳамкориҳои тиҷоративу иқтисодӣ ва илмиву техникӣ ҷараён дорад.

Дар ин ҷаласа ҳайати Тоҷикистонро раиси Кумитаи давлатии сармоягузорӣ ва идораи амволи давлатии ҷумҳурӣ Қодири Қосим ва ҷониби Молдоваро муовини вазири иқтисоди ин кишвар Тудор Копчак намояндагӣ мекунанд.

Дар ҷаласа ҷонибҳо имконоти таҳкими ҳамкориҳо дар бахшҳои иқтисоду тиҷорат ва сармоягузорӣ, кишоварзӣ ва нақлиёт, маорифу тандурустӣ, илму фарҳанг ва ҳамчунин масъалахои дастгирии тиҷорати хурду миёнаро баррасӣ мекунанд.

Зимни ҷаласа зикр гардид, ки сатҳи кунунии ҳаҷми муомилоти мол миёни кишварҳо ба имконоти мавҷуда ҷавобгӯ нест ва таъкид шуд, ки рушди иқтисоди ҳарду кишвар барои таҳкими минбаъдаи муносибатҳои дуҷонибаи тиҷоративу иқтисодӣ шароитҳои мусоид фароҳам меоварад.

Ҷонибҳо зарурати рушди шаклҳои нави фаъолияти муштарак дар бахши тиҷорат, имконоти амалисозии лоиҳаҳои муштарак, андешидани тадбирҳо ҷиҳати афзоиши ҳаҷми муомилоти мол миёни кишварҳо, густариши робитаҳои тиҷоратӣ ва истеҳсолӣ дар пояи фаъол гардонидани заминаҳои қарордодӣ-ҳуқуқиро таъкид намуданд.

Бино ба маълумоти омории Тоҷикистон, соли 2014 ҳаҷми муомилоти мол миёни Тоҷикистону Молдова 3,9 млн. доллари ИМА-ро ташкил додааст. Ҳаҷми содироти мол аз Тоҷикистон ба Молдова ба 1,3 млн. ва воридоти моли ин кишвар ба Тоҷикистон ба 2,6 млн. доллари ИМА баробар шудааст. Дар муқоиса бо соли 2013 соли гузашта ҳаҷми муомилоти мол миёни Тоҷикистону Молдова ба андозаи 25,3% коҳиш ёфтааст.