Палатаи поёнии парлумони Тоҷикистон имрӯз, 30 июн Созишномаи санаи 29 апрели соли равон баимзорасида байни Ҳукумати Тоҷикистон ва Ҳукумати Иёлоти Муттаҳидаи Амрико оид ба андозбандии кормандони маҳаллии сафорати Амрико дар Душанберо якдилона тасдиқ намуд.

Зимни суханронӣ назди вакилон оид ба шарҳи ин масъала муовини вазири корҳои хориҷии ҷумҳурӣ Парвиз Давлатзода изҳор намуд, ки созишномаи мазкур миёни ҷонибҳо қариб муддати якуним сол мувофиқа шуда, ахири моҳи июн аз ҷониби сафири ИМА дар ҶТ Сюзан Эллиотт ва раиси Кумитаи андози ҶТ Нусратулло Давлатзода ба имзо расид.

Зикр гардид, ки мутобиқи созишномаи тасвибшуда, ҳайати шахсии маҳаллии намояндагии дипломатии ИМА дар Душанбе ҳамасола ба буҷети Тоҷикистон ба сифати андоз аз даромад ҳудуди 400 ҳазор доллари ИМА маблағ пардохт мекунанд.

Мебояд гуфт, қаблан низ парлумони Тоҷикистон ба ин монанд як созишномаи дигар миёни ҳукумати кишвар ва Дафтари САҲА дар Душанберо ҳам ба тасвиб расонида буд, ки мутобиқи он кормандони маҳаллии ин ниҳод ҳамасола ба буҷети Тоҷикистон аз даромадашон беш аз 350 ҳазор доллари ИМА андоз пардохт хоҳанд кард.