Дар Тоҷикистон доир ба расмиёти танзими баҳсҳои тиҷоратӣ бо иштироки миёнаравон - медиаторҳо қонунгузорӣ таҳия мешавад.

Дар лоиҳаи қонун «Дар бораи медиатсия» ҳалли баҳсҳои тиҷоратии бамиёномада байни тоҷирони ватанӣ ва хориҷӣ бидуни муроҷиат ба суд пешбинӣ шудааст.

Гурӯҳи кории иборат аз намояндагони Дастгоҳи иҷроияи президент, Суди олӣ, Суди олии иқтисодӣ, ҳамчунин вазорату идораҳои марбута барои таҳияи лоиҳаи қонуни мазкур ҳанӯз тобистони соли гузашта таъсис ёфта буд, хабар медиҳад дафтари матбуоти Палатаи савдо ва саноати Тоҷикистон.

Таҳияи лоиҳаи қонун аз ҷониби Бонки аврупоии таҷдиду рушд ва Ташкилоти байнулмилалии ҳуқуқи рушд маблағгузорӣ мешавад.

Дар Палата бар ин назаранд, ки қабули қонун «Дар бораи медиатсия» ба иштирокчиёни фаъолияти иқтисодии хориҷӣ ҷиҳати ҳалли алтернативии баҳсҳо шароит фароҳам оварда, ба ҷалби сармоягузорӣ ва рушди соҳибкорӣ мусоидат мекунад.

Гуфта мешавад, моҳи майи соли 2017 назди Палатаи савдо ва саноати Тоҷикистон Маркази медитатсия ва ҳуқуқ таъсис дода шудааст.

Айни замон аксари ширкатҳои маъруфи ҷаҳон аз тартиботи медитатсия истифода мебаранд. Масалан, таибқи баъзе маълумот, дар ИМА 97%-и баҳсҳои тиҷоратӣ тариқи ин тартиботи алтернативӣ ҳаллу фасл мешаванд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.