Бар асари садамаи ҳавопаймои Sukhoi Superjet-100-и ширкати “Аэрофлот” дар фурудгоҳи Шереметевои шаҳри Маскав 41 нафар ба ҳалокат расид.

Бино ба маълумоти хабаргузории РИА Новости, аз 78 нафар шахсони дар ҳавопаймо қарордошта 37 нафар - 33 мусофиру 4 аъзои сарнишинон зинда мондаанд.

Гуфта мешавад, боз шаш нафар дар бемористон бистарӣ шудаву вазъи солимии се нафари онҳо вазнин арзёбӣ мешавад.

Ҳавопаймои Sukhoi Superjet 100-и хатсайри Маскав - Мурманск пас аз 28 дақиқаи парвоз ба фурудгоҳи Шереметево баргашта, нишасти таъҷилӣ анҷом медиҳад. Зимни нишаст муҳаррики ҳавопаймо оташ гирифтааст. Ҳодиса мавриди таҳқиқ қарор дорад.

Иҷрокунандаи вазифаи губернатори вилояти Мурманск Андрей Чибис дар минтақа се рӯзи мотам эълон кард. Ба оилаҳои мусофирони ҳалокшуда 1 млн. рубл ва шахсони дар бемористонҳо бистаришуда 500 ҳазор рубл дода мешавад.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.