Душанбе. 13-уми апрел. ОИ «Азия-Плюс» - Имрӯз дар нишасти матбуотӣ сардори Сарраёсати геологияи назди ҳукумати ҶТ Азими Иброҳим изҳор дошт, ки корҳои иктишофиву ҷусутуҷӯӣ, ки аз ҷониби ширкати русиягии ҶСК «Зарубежнефтегаз» дар майдони нафту гази кони «Саргазон» гузаронида шуданд, бентаиҷа анҷом ёфтанд.

            А.Иброҳим бар ин назар аст, ки корҳо дар ин майдон бидуни истифода аз фанновариҳои замонавӣ сурат гирифта, аз ин рӯ, натоиҷи он низ қаноатбахш нест. «Мо то ҳанӯз аз захоири воқеии нафту газ дар майдони «Саргазон» огаҳии комил пайдо накардем ва коршиносони русро зарур аст, дубора дар ин кон корҳои иктишофиро бо сифати баланд ба анҷом расонанд», - гуфт ӯ.

            Ба гуфтаи ӯ, айни замон тамоми нерӯву имконоти коршиносони ҶСК «Зарубежнефтегаз» ба иҷрои корҳо дар майдони нафту гази «Сариқамиш»-и ноҳияи Шаҳринав равона гардидааст. «Корҳои иктишофиро дар ин майдон мутахассисони идораи нефтегеофизикаи шаҳри Саратови Русия баргузор месозанд ва мо ҷиҳати истифодаи тарзу усулҳои тоза ва технологияи замонавӣ зимни баргузории корҳо бо онҳо гуфтушунид кардем», - баён дошт А.Иброҳим.

            Сардори Сарраёсати геология афзуд, ҳарчанд истифодаи технологияи замонавӣ гарон аст, бо кӯмаки он метавон дақиқан аз захоири майдон маълумот пайдо кард. «Мо боварӣ дорем, ки дар майдони «Сариқамиш» коршиносони рус бо назардошти таҷрибаи пешинаи майдони «Саргазон» аз фанновариҳои ҷадид ва тарзу усулҳои тозаи иктишофӣ пурсаамр истифода хоҳанд бурд», - гуфт вай.