Душанбе. 13-уми апрел. ОИ «Азия-Плюс» - Рӯзи шанбеи ҳафтаи гузашта аз ҷониби раиси шаҳри Душанбе Маҳмадсид Убайдуллоев оид ба сохтмони мактаби нав дар маҳаллаи Камоли Хуҷандӣ барои 660 ҷойи нишаст қарор ба имзо расид.

            Чӣ тавре ки сухангӯи раиси пойтахт Шавкат Саидов ба ОИ «Азия-Плюс» хабар дод, лоиҳаи сохтмони мактабро ҶДММ «Гипрострой» омода сохта, он бояд дар пешорӯи таҷлили ҷашни 20-умин солгарди Истиқлолияти ҶТ, соли 2011 ба истифода дода шавад. «Ҷиҳати сохтмони мактаб барои истифодаи бемӯҳлат 1,4 гектар замин ҷудо гардид», - гуфт ӯ.

            Ба гуфтаи Ш.Саидов, арзиши лоиҳаи сохтмон пас аз доир сохтани тендер, ки мақомоти шаҳрдорӣ то ахири ҳамин моҳ эълон хоҳанд кард, муайян мешавад.