Душанбе. 10-уми апрел. ОИ «Азия-Плюс» - Чанде қабл дар Вазорати умури хориҷии ҶТ бо иштироки мақомоти раҳбарии Бозрасии давлатии автомобилии ҷумҳурӣ ва шаҳри Душанбе вохӯрии директори генералии КВД «Тоҷдипсервис» Ардашери Қодирӣ бо намояндагони корпуси дипломатии муқими Тоҷикистон ва созмонҳои ба он баробаршуда баргузор шуд.

            Чӣ тавре ки аз департаменти иттилооти Вазорати корҳои хориҷии ҶТ ба ОИ «Азия-Плюс» хабар доданд, дар мулоқот масъалаи аз ҷониби намояндагони корпусҳои дипломатӣ риоя кардани қоидаҳои амалкунадаи ҳаракат дар роҳ дар ҶТ мавриди баррасӣ қарор гирифт.

            А.Қодирӣ аз намояндагони корпусҳои дипломатии муқими Тоҷикистон даъват ба амал овардааст, ки ба риояи қоидаҳои муқаррашудаи ҶТ дар бораи ҳаракат дар роҳ таваҷҷӯҳи хос зоҳир созанд ва новобаста аз шаҳрванди кишвари хориҷӣ буданашон, дар сурати дуруст будани талаботи кормандони БДА, ба онҳо итоат намоянд.