Душанбе. 7-уми апрел. ОИ «Азия-Плюс» - Дар пойтахти Чин – шаҳри Пекин рӯзи якшанбеи ҳафтаи гузашта бо иштироки сафири Чин дар Тоҷикистон Рашид Олимов бахшида ба гул кардани ниҳолҳои зардолуи аз ҷониби мардуми Тоҷикистон ба мардуми Чин тӯҳфашуда чорабинии ҷашнӣ баргузор шуд.

            Тибқи иттилои хабаргузории «Казинформ», моҳи мати соли 2006 дар заминҳои хоҷагии санҷишиву селексионии назди Донишгоҳи аграрии шаҳри Пекин маросими шинонидани 125 бех ниҳоли зардолуи навъи «Мирсанҷалӣ» ва «Бобоӣ», ки аз ҷониби Тоҷикистон ба мардуми Чин тақдим гардида буд, доир гардид. Имрӯз метавон гуфт, ки ниҳолҳо нашъунамо ёфта, гул кардаанд ва тобистон ба ҳосил хоҳанд даромад.

            Дар суханронии худ Рашид Олимов ба омӯзгорону донишҷӯёни донишгоҳ барои ғамхорӣ зоҳир намудан дар парвариши ниҳолҳои зардолу изҳори миннатдорӣ кард. «Дар Тоҷикистон 26 навъи зардолу парвариш карда мешавад ва онро мо чун рамзи дӯстӣ ба мардуми Чин тақдим кардем», - гуфт ӯ ва таъкид сохт, ки боғи зардолуи Чину Тоҷикистон гувоҳи дӯстии рӯз то рӯз таҳкимёбандаи халқҳои ду кишвар хоҳад гардид.

            Дар чорабинии ҷашнӣ донишҷӯёни тоҷики муқими Чин ва донишҷӯёни Донишгоҳи аграрии Пекин доир ба баҳору дӯстӣ шеърҳо қироат намуданд.