Душанбе. 6-уми апрел. ОИ «Азия-Плюс» - Ахири ҳафтаи гузашта дар вохӯрии вазири кишоварзии ҷумҳурӣ Қосим Қосимов ва мушовир оид ба рушди соҳаҳо ва банақшагирии Бонки рушди Осиё Боб Хатсон масъалаи роҳҳои беҳбуди сифати нахи пахта дар Тоҷикистон мавриди баррасӣ қарор гирифт.

            Чӣ тавре ки аз Вазорати кишоварзии ҷумҳурӣ ба ОИ «Азия-Плюс» хабар доданд, дар ҷараёни мулоқот Қ.Қосимов изҳор доштааст, ки бо дастгирии молиявии БРО шурӯъ аз оғози соли гузашта Тоҷикистон тадриҷан аз мушаххассозии сифати пахтаи ГОСТ ба USDA (меъёри амрикоӣ) мегузарад. Ӯ қайд кард, ки минбаъд сифатнокии нахи пахта аз ҷониби ширкати мустақили маъруфи байнулмилалӣ сурат хоҳад гирифт.

            Вазири кишоварзии ҷумҳурӣ аз он изҳори ташвиш кардааст, ки феълан на ҳамаи корхонаҳои пахтатозакунии кишвар ба талаботи меъёри ҷаҳонӣ ҷавобгӯ мебошанд ва масоили кашонидану нигаҳдории нахи пахта низ қаноатбахш нест.

            Дар фарҷоми вохӯрӣ Қ.Қосимов аз намояндаи БРО дархост кардааст, ки аз ҷиҳати молиявӣ ва техникӣ ба таъсиси шӯъбаи беҳсозии сифати пахта дар назди вазорат мусоидат карда шавад.