Шӯрои уламои Маркази исломии Тоҷикистон дар ҷаласаи навбатии худ дар бораи муайян кардани рӯзи Иди саиди Қурбон қарор қабул кард.

Тавре ки дар сомонаи Маркази исломии ҷумҳурӣ хабар дода мешавад, раиси Шӯрои уламои Марказӣ Саидмукаррам Абдуқодирзода зикр кард, ки мувофиқи далелҳои илмӣ ва дар асоси хулосаи Институти астрофизикаи Академияи миллии илмҳои Ҷумҳурии Тоҷикистон рӯзи Иди саиди Қурбон дар кишвар ба шанбе 9-уми июл рост меояд.

Тибқи қарори Шғрои уламо, мувофиқи ҳисоби илмӣ Иди саиди Қурбон дар тамоми қаламрави Тоҷикистон рӯзи шанбе 9-уми июл таҷлил карда мешавад. Намози иди саиди Қурбон дар масоҷиди саросари кишвар соати 06:00 дақиқа муқаррар карда шудааст.

Дар анҷоми ҷаласа раиси Шӯрои уламо аз аъзои Шӯро ва имомхатибон талаб кард, ки дар мавъизаҳояшон роҷеъ ба неъмати бебаҳои сулҳу оромӣ суханронӣ намуда, дар дастгирии ятимону пиронсолон ва табақаи ниёзманди ҷомеа, рушду шукуфоии кишвари азиз саҳми худро гузоранд.

Мувофиқи меъёрҳои қонуни ҶТ “Дар бораи рӯзҳои ид”, агар санаи иди расмӣ, ки дар он рӯзи истироҳат эълон шудааст, ба рӯзҳои истироҳат - шанбе ё якшанбе рост ояд, рӯзи дигари корӣ ҳам рӯзи истироҳат мешавад. Ба ин тариқ, рӯзҳои 9, 10 ва 11-уми июл дар Тоҷикистон рӯзҳои истироҳатанд.

Иди Қурбон идест, ки онро ҳамасола мусалмонони ҷаҳон дар рӯзи 10-уми Зулҳиҷҷа пас аз 2 моҳу 10 рӯзи Иди Фитр ҷашн мегиранд.  Дар Иди Қурбон мусалмонони ҷаҳон ба сафари ҳаҷ рафта, зиёрати Хонаи худоро ба ҷо меоранд. Ашхоси тавонманд дар ин рӯз, тибқи расми ин ойини мазҳабӣ,чорво қурбонӣ карда, ба ҳамсояҳои камбизоат ва мардуми дастнигар либосворӣ ва ё пулу маводи ғизоӣ кумак мекунанд.

Дар Тоҷикистон таҷлили Иди Қурбон маъмулан бо намози ид дар тамоми масҷидҳо шурӯъ мешавад. Рӯзи ид пас аз адои намози ид мардум ба дидори хешу ақрабо ва барои дуову фотеҳа сари мазори гузаштагони худ мераванд. Баҳри пешвози меҳмонон дар хонаводаҳо дастурхони идона ороста мешавад.

Дар Telegram, Facebook, Instagram, OK ва ВК бо мо бимонед.