Муҳаммад Расулови 62-сола, сокини шаҳри Исфара ва Қизларгул Тоҷиева, сокини 64-солаи ноҳияи Қубодиён зимни адои маросими ҳаҷ дар Арабистони Саудӣ фавтидаанд.

Кумитаи дин бо истинод ба  сардухтури мавсими ҳаҷ-2022 Тӯрахон Шарифзода хабар медиҳад, ки ҳарду зоири тоҷик бинобар сабаби сактаи дил даргузаштаанд.

Гуфта мешавад, маросими ҷанозаи ҳар ду марҳум дар “Масҷид-ул-ҳаром” баргузор гардидааст.

Ба иттилои манбаъ, зоирони дигари тоҷик солим буда, бинобар сабаби гармии аз ҳад зиёди ҳаво, баъзеи онҳо «бо сабаби нӯшидани оби хунук ба бемориҳои дарди гулӯ, зуком, баландшавии ҳарорат, бемадорӣ, дарди мушакҳо, фишорбаландӣ ба табиб муроҷиат мекунанд».

Инчунин гуфта мешавад, байни зоирини тоҷик то имрӯз ягон ҳолати гирифторӣ ба “COVID-19” ба қайд гирифта нашуда, барои пешниҳоди хизматрасониҳои тиббӣ ба зоирони тоҷик шароити хубе фароҳам аст.

Сурат: Кумитаи дин

Ёдрас мекунем, ки имсол 3,5 ҳазор нафар шаҳрвандони Тоҷикистон ба зиёрати Хонаи Худо мушарраф мешаванд. Арзиши сафари ҳаҷ барои тоҷикистониён имсол 60 ҳазору 520 сомонӣ (5 ҳазору 350 доллар) муқаррар шуд. Бозгашти ҳоҷиён ба Ватан рӯзи 17 июл дар назар аст.

Қобили зикр аст, ки солҳои 2020 ва 2021 тибқи қарори мақомоти Арабистони Саудӣ, бинобар маҳдудиятҳои карантинӣ ба ҳаҷ рафтан ғайриимкон буд.
Дар Telegram, Facebook, Instagram, OK ва ВК бо мо бимонед.