Бинои асосии таълимии Донишгоҳи давлатии тиббии Тоҷикистон ба номи Абӯалӣ ибни Сино соли равон ба истифода дода мешавад. Дар ин бора ректори ДДТТ Маҳмадшоҳ Гулзода зимни нишасти матбуотии имрӯза хабар дод.

Ба таъкиди ректор, иншоот аз се бинои 9 ва 4-ошёна иборат буда, дар бинои асосӣ бунёди толори маҷлисӣ барои 1680 ҷойи нишаст ва ошхонаи замонавии дуошёна барои 600 ҷойи нишаст барои омӯзгорону донишҷӯён ба нақша гирифта шудааст.

«Ҳоло дар атрофи биноҳои таълимӣ ва хобгоҳҳо корҳои сохтмонӣ ва таъмиру ободонӣ идома доранд», - афзуд Маҳмадшоҳ Гулзода.

Ёдовар мешавем, ки 28 апрели соли 2017 президенти ҷумҳурӣ Эмомалӣ Раҳмон ҳамроҳи раиси шаҳри Душанбе Рустами Эмомалӣ ба сохтмони бинои асосии таълимӣ оғоз бахшида буданд.  Бинои Донишгоҳи давлатии тиббии Тоҷикистон дар шаҳраки «Шифобахш», воқеъ дар хиёбони Абӯалӣ ибни Синои пойтахт ҷойгир мебошад.

Маблағи умумии сохтмони бинои асосӣ аз руи ҳисоби пешакӣ 85 ммлн 416 ҳазор сомониро ташкил дода буд.

Гуфта мешавад, ки дар бинои асосӣ толори маҷлисгоҳ, синфхонаҳо, китобхона бо толори хониш, инчунин синфхонаҳои хурд пешбинӣ шудааст. Дар назди даромадгоҳи асосии донишгоҳ муҷассамаи Абӯалӣ ибни Сино гузошта шудааст.

Қобили зикр аст, ки лоиҳаи бинои асосӣ аз ташхиси давлатии бинокорӣ гузаштааст.

Дар Telegram, Facebook, Instagram, OK ва ВК бо мо бимонед.